ظني تروف القلب توفي حقوقه=فلبي وفـــا في غصة الوقت ناجاك
ظنَّه تحبه وانتشى في عروقــــه=أثْــرَهْ مْخـــدوعٍ في حقيقة نـــواياك
أظهر كتاب الزِّيف بانت فــروقه=الحــق يظــهر يـتّـضح في سوايـاك
ساعه تراضي القلب ساعه عقوقه=يا شـــين طبعك طـايعٍ ذيـك أو ذاك
وين الوفا والغدر بانت طــــروقه=هــذي حـقـيـقه واضحه قـالــها فاك
لاجلك ( خفايا الأمس ) كاتم حروقه=والا ( هديـة شوق ) أظـهـر خـفـاياك
زرع اتهامك واضحٍ في عذوقه=كم ضاق رحم الكون فيني وعـــدّاك
تبقى الحقيقه والمعاني ســـبوقه=واضح معي في مبدأ الحرف واقراك
لا تنتظر من قلب خلّك بروقه=بطفي ضيا حبك من القلب وانســـاك
ما عاد لي تفكير تطفي شــروقه=ما دام بقناع الـغــــدر زيف مـبــداك
والا المشاعر بي تراها صدوقه=ما نامت بيوم الجفا تطلب ارضــاك
خلِّك توعّد الله اقــوى يعـــــوقه=منهـو تســبـب بالجــفا والخبر جــاك
لكن جهاز القلب بانت حـروقــه=ثــمٍ تعـــّرى وانكـــشف سر مغزاك