أكتب احاسيسي واترجم حنيني = بالحرف والكلمه لخلي واناجيه
أنثر له أشواقي وخافي كنيني = واسرح مع اطياف المحبه واناديه
واسأل متى تفرح بشوفتك عيني = يامنوة اللي ضيعّـنـه لياليه !!
ومتى على الله يوفي الوقت ديني = واللي يبي مني علشانك أعطيه
حبك غدا مثل النفس محتويني = ياحاضر الايام .. ياكل ماضيه
ياغايته في مقبلات السنيني = ياكل ماله ياسبب كل مافيه
يافرحةٍ عيت بدربي تجيني = وعيت تــنــّور بالتلاقي مماشيه
ان قلت هذا ظلم : اطلق يديني = يقول شوفي منهو الشور بيّديه
لو كنت حولي ؟ لو سمعت بونيني = قدرت قلبٍ مايغير مباديه
قلت أفهم اللي تقصده ياظنيني = وادري بحبك داخل الصدر مخفيه
ليت الليالي تجمع العاشقيني = وكلن على ماقيل يفرح بغاليه