خفايا الأمس ,, موقع الشاعرة ينابيع السبيعي

"صرخة اغراب"

طــال الجفا وقـلبٍ تمــــناه ما صـاب=وجـفـّت به غصون الغلاة الـمواريف
هبت سمومٍ تـلـفح زهــور و اعشـاب=زاهي ربيعٍ احــرقه واهج الصـــيــف
يذرى هشيمٍ عودها عصف و تـــراب=وقـاع به الـّنــوار أصـبح تجــاريــف
غابت تـغـاريـدٍ حـكــت شـوق الاحباب=ولا عــاد بــاقي من لحـنها مهاتـيــف
من بعد ماهي روضةًٍ شوق واعجاب= قـفـّت به الذكرى على واهي الهـيـف
يـامـا سقيـته باصــدق الـود ما طـاب=نبع الـوفــاء أسـقـيه كـيٍفٍ على كيف
ولو صابني باسم الوفاء جور وعتاب= يهون جرحي في رضاة الـمـوالـيف
عــطـــــاني بـيـمناي وردٍ و أطـيـــاب=وفي كـفي اليـسرى عهود ومحالـيف
والـيوم ينـسى عهـدنا و الـغــــلا ذاب=وين الذي لا جيت هب الهوى ريـف
اقسم لي بصدق ووفاء عهد الاحباب=ولا وثق برجواي حسن الـتـصاريف
أدمى خفــــوقي بـالـوهم زيـف كـذاب=اوثــق عهـوده با لهوى شفتها زيـف
مات الغـلا في خافقي و الهـوى ذاب=ولا يـنـفع بـمـوت الغلا قول يا حيف
الصدق بـيّـن و الكـذب ما له احـجـاب=شمس الحقيقه واضحه صدقها شيف
يـامـا تـمـاريـتـه غلا بـين الأصـحـاب=واليـوم تـبـقى ذكــريـات الصـواديـف
جـرحٍ عمـيـق بخـافـقي مـا له اطبـاب=جـف العطا واحيا هموم و تحاسيف
أدمى بشريــان القـصـايـد بلا اسباب= ولا لـي مع الأشـعار نظـم ومـوالـيف
مالي جــدى من عضـة الـبـهـم بالناب=حـبه مضـى لـيله حـلـوم و تخـاريف
هــذي النهاية صرخته صرخة اغراب=ما عـاد يـلـفى في خـيـالي لـهـم طيـف