غيم الهوي قدام عيني شروقه=لكن بقلبي يحترق هم واهات
يقوله اللي كل بارق يسوقه=يجتاح باحساسه جميع المسافات
صبحٍ تنفس في بهاه وسبوقه=كنه يحاكي مهجة الروح والذات
لافج في صدر الليالي فتوقه=يشعل شموعه بالغلا ضوح نجمات
يسهر على ذكرى حبيبٍ يشوقه=ويقول تو الوقت بدري و لا فات
ذكراك بلسم خافقي وانت ذوقه=يامرحبا فيها الى منّها جات
طيفك كما مزنٍ ترزّم بروقه=عطاه دائم والليالي مديات
وحبك سرى بالقلب داخل عروقه=حبٍ يفوق الوصف في كل الاوقات
غيرك بْداخل ناظري طاح سوقه=بينك وبينه في عيوني مسافات
عٍزَّاه من روحٍ ٍ عليك مْحروقه=تبكي حنين وتمسح الدمع بسكات
والدمع غطّى كل شي يفوقه=إلا الحنين اللي له سْنين ما مات
نزف الألم يجتاح داخل عروقه=قلبٍ تعلم في هواك المعاناة
ياقلب لا يزعلك غيبة بروقه=من حْب قلبه يسهر الليل مابات
أنصحك ساير صاحبك لا تبوقه=يمكن ظروفه ماتساعد للانصات
حاول وجرب واستمر في لحوقه=لابد مايسقيك مره حلاوات
وخلك مع اللي شفت فنّه وذوقه=حتى يتحقق حلم ذاتك مع الذات

قريت خطه وشفت نفسه شفوقه=م الشوق حنت كالركــاب الظميات
تنظر مخيلــه ود تمطــر دفوقـه=داخـل معاليق الحشا كـــل الاوقات
تطفي لهيب الشـوق تـروي عروقـه=قلـب ٍ تعــذب باليـالي ولا بـات
صابه عنـا خلـّه وقـد زاد عوقـه=صابر على ضيــم الزمـن والمعاناة
من بعدهم قلب المحب زاد شوقه=واتذكرت نفسه هــوى ود ما مات
عاف الكرى والدمع حاير بموقـه=يحسب زمن وقـته دقايق وساعات
عسى ان وبل الخير تبطي حقوقه=وتثمر دروب الود جنـه وواحات
ياللـه عسى باكـر يحقق خفوقـه =كل الأماني بالهـوى والطمـوحات