سألتك واستباحت ارض انسانك من الاخلاق = خلاص أرجوك جاوب حيرتي والا أشتبي فيني
أعيش الموت كان الموت في دنياك ماينطاق = علامك يوم أفكر أبتعد بالوصل تغريني ؟
أحس انك ملاك الارض اشوفك للهـوى ميثاق = كثر ماصارت الفرقا مع الايام تعنيني
حبيبي والمعاني من لساني كنها تنساق = ولا تنساق لو مانت بخيالي يانظر عيني
ترى ماكل شمسٍ لاشرقت يصفي بها الأشراق = وكم صبحٍ نهارك به يضيع ولا يقديني
انا كنت أحـْسَب ان الهم دمعة تستبيح احداق = ولكني لقيتك عبرةٍ باقصى شراييني
دخيلك وش يفيد اللي كتبته يوم صدري ضاق = وانا حرفي تقفاه الحنين وغربة سنيني
دخيلك والخفوق اللي نزف جرحه من الأعماق = لا شاف ان الوفا بدموع عينك ما يعّزيني
دخيلك وش بقى للعشق ياول وآخر الاشواق = بعد ما ضاعت احلام الهوى ما بينك وبيني

لقيت الشعر باشكاله على ما تشتهي لذواق =مسطر في ورق واشرق سماء كل الدواويني
لقيته واضح المعنى وفي فن الحكم سباق=صراحة لو بغيت الصدق يا مشعل خطف عيني
سألت وقلت من هو يا ترا هالشاعر العملاق = ومن هو فارس القاف الذي خاض المياديني
أجابتني حروف القاف قالت شف سما الأفاق = ينابيع السبيعي سطرتني واعتنت فيني
رجعت وقلت ماشاالله جل الواحد الرزاق = عظيم الشأن له صومي وله حجي وله ديني
بعدها جيت أباكتب رد هذا القاف فالأوراق = ويبقى لي شرف لوما كتبنا غير حرفيني
ينابيع الحقيقة ماجتماع إلا وراه افراق = وهذا حال دنيانا تعاملنا بوجهيني
كم انسان شكى منها وكأس المر منها ذاق= بكى غالية يابنت العرب والناس ممسيني
تهور في متاهات(ن) وصابه سومها الحراق = كوت قلبه وناس من بلاويها مجانيني