أطلبك انا يا الله .. ياعالي الشان = ياعالمن في برها مع بحرها
تلطف بروحٍ تشتكي ضيم الاحزان = وتفرج هموم اللي دموعه نثرها
أحلام عمره وردها اليوم ذبلان = يوم الليالي غاب عنها قمرها
دنيا التعاسه كلها هم وأشجان= ونفسه من الحرمان عاشت قهرها
الحلم جثه تحتضر شوف الاعيان =والعين تهدي للمواجع عْبَرها
كم من شجاعٍ ذله الوقت وانهان = طاع الضنون اللي خفوقه بذرها
الوقت هذا وقت كاذب وخوان = والضحكه الصفرا تناقض صوَرها
يعني الحقيقه غايبه كل الاحيان = واهل النوايا الصادقه من عذرهـا
ياكثر مانطرب على صوت الالحان = وقلوبنا نزف المواجع دمرها
كان المعاني ماتجي حسب الاوزان = والهم في دنياك يسرج خطرها
( اضرب على الكايد ليا صرت بحلان ) = لو الهقاوي تحتجب من حذرها
ماهو ضروري تتبع فلان وفلان = وترضي نفوسٍ حقدها ماسترها
من مد كفه للولي يجزا الاحسان =ومن مد كفه للبشر ماجبرها
قل للذي مايسمع العلم خسران = يحداه من ضيم الليالي قدرها
النار تشعل داخله الف شيطان = حتى تطاير من عيونه شررها
وان دارت الدنيا على مر الازمان = تبقى المشاعر صادقه في نحرها
دام الوفا بندق والاحساس نيشان = وقمة شموخي نظرتي من نظرها
أصدق حروفي للمضامين عنوان = والصبر غايه ماتكذب خبرها