لا تحسب انّك على الخاطر تهون=كلمتك للحين ما هانت علي
إنت أكثر شخص يعرف من يكون = والله انك بالغلا حسبة هلي
ياحبيبي ( للمحبه ) ما أخون = والوفا غرسة روت من منهلي
بس لا يساورك ظن من الظنون = لو تغيب سنين قلبي مايسلي
كل نبضه داخل القلب الحنون = وكل عرقٍ بالمحبه لك ملي
والمشاعر والجوارح والشجون = من غيابك نبضها يغلي غلي
أسألك بالله من غيرك يمون = ومنهو اللي في غرامك مبتلي
يابقايا الحلم وابعاد السكون= من جفاك عروق قلبي تصطلي
ياحبيبي شوفتك تشفي الطعون = وكل همٍ بالضماير ينجلي
لا كتبتك هاجسي برق ومزون = والمعاني تلبس انواع الحلي
مرهف أحساسك قريته بالعيون = ومن تجاهل نظرتك قلبه خلي
من لبس ثوب الكرامه مايهون = ومن تجـّمل يشرب الكاس الملي
انتظرني يا أكون ؟ أو لا أكون = وكان طال البعد لا تشره علّي