سلامتك يالغالية وألف لا باس=الله يجيرك من صدوف المقادير
لا يا بعد كل المخاليق والناس=يا عل ما صابك مثوبه وتطهير
يا ميمتي كلي معك فكر واحساس=بين الشدايد والظروف المعاسير
حكمة قدر والصبر للمؤمن قياس=لا بد من يوم الفرج والتياسير
يا تاج راسي سيرتك ترفع الراس=سيرتْك حازت بالفخر كل تقدير
بك المبادي الساميه والوفا ساس=الصدق طبعك والحقايق تفاسير
وبين الفضيله والسكينه والاحساس=مبدا التسامح فوق كل المعاذير
اشراق وجهك يفضح قلوب الاجناس=ومنك الرضى يسرج خيول المشاوير
ضحكة حجاجك شمعه بليل الاوناس=وما عاد باقي غير الاحزان تعبير
الشمس غابت والمعاليق يبّاس=وصرنا نشوفك في وجيه المسايير
الهم والتفكير والضيق والياس=وجيش الحزن وسط الحنايا طوابير
أرجي إله الكون لا حل هوجاس=يفرج لمن همّه يفوق التعابير
ندعي لك الله دعوة الناس للناس=يا جعلها عند الولي عنك تكفير
لك الدعا يالغاليه نبض واحساس=ولشوفتك نسبق هبوب التباشيير